ငှက်သိုက် အကြောင်းသိကောင်းစရာ

ငှက်သိုက်သည် ပျံလွှားငှက်မျိုးတွင် ပါဝင်သည့်ငှက်က လုပ်သော အသိုက်ပင်ဖြစ်သည်။
ထိုငှက်မျိုးသည် မိမိတို့၏အသိုက်ကို အခြားငှက်များကဲ့သို့ သစ်ရွက်သစ်ကိုင်းများဖြင့်
မပြုလုပ်ကြဘဲ ထူးဆန်းစွာ အာခေါင်မှ အာစေးတစ်မျိုးကို အန်ထုတ်၍ အသိုက် ပြုလုပ်ကြသည်။ အစဦးဆုံးထွေးထုတ်သောအာဆေးမှာ ဖြူစင်၏။ ထွေးထုတ်ရဖန် များလာ သောအခါ၌ကား သွေးပင်ပါလာတတ်သည်။ ငှက်သိုက်သည် ဆေးဖက်ဝင်၍ အာဟာရဓာတ် ပြည့်ဝသော အစာတစ်မျိုးဖြစ်သည့်အပြင် အရသာမှာ အထူးပင် ကောင်းမွန်ပေသည်။ ထို့ကြောင့် ငှက်သိုက်ကို တန်ဖိုးကြီးပေး၍ ၀ယ်ယူကြရသည်။
ငှက်သိုက်ထုတ်ပေးနိုင်သော ငှက်မျိုး ၃မျိုးခန့်ရှိသည်။ ယင်းတို့ကို မိုးစာငှက်၊ ပြီလဲငှက်၊ ဇီဝစိုးငှက်ဟူ၍ ခေါ်ကြသည်။ မြန်မာနိုင်ငံ၌ ရရှိသောငှက်သိုက်မှာ ဇီဝစိုးငှက်မျိုးက လုပ်သော ငှက်သိုက်ဖြစ်သည်။ ငှက်သိုက်ကို ထားဝယ်ကမ်းခြေအနီးရှိ ကျွန်းများ၊ မြိတ်ကျွန်းစု၊ ပုသိမ်မြို့ အနောက်တောင်ဖက်ရှိ ကျွန်းများတွင် တွေ့ရသည်။ ထို့ပြင် မလ္လာယုကျွန်းဆွယ်၊ ယိုးဒယား၊ ဖိလစ်ပိုင်နိုင်ငံအနီးရှိ ကျွန်းများတွင်လည်း တွေ့ရသည်ဟု ဆိုသည်။
ထိုငှက်မျိုးသည် စာကလေးအရွယ်လောက်သာရှိသည်။ ပျံသန်းရာ၌ အလွန်လျင်မြန်သည်။ ညအိပ်သည့်အချိန်မှလွဲ၍ တနေ့လုံးပျံသန်း၍ နေနိုင်စွမ်းရှိသည်။ ထိုငှက်မျိုး၏ ခြေချောင်း ကလေးများသည် ကား၍ရှေ့သို့ ရှည်ထွက်လျက်ရှိသည်။ ထိုခြေတံမျိုးရှိသဖြင့် ကျောက်ဆောင်၏ အစွန်အဖျားများပေါ်၌ နားနေနိုင်ကြသည်။ ထိုငှက်ကလေးများသည် လူသူဝေးသော ကျွန်းများပေါ်ရှိ ကျောက်လိုဏ်ဂူနံရံများတွင် အသိုက်ပြုလုပ်၍ နေကြသည်။
ငှက်သိုက်သည် အချင်း ၂ လက်မ ၃လက်မခန့်ရှိ၍ စောက် ၁ လက်မခန့်ရှိသည်။ ငှက်တို့သည် တပေါင်းတန်ခူးလများတွင် အသိုက်လုပ်တတ်ကြသည်။ တမြုံလျှင် ဥ ၂လုံးရှိသည်။ ငှက်သိုက်များကို လိုက်လံသိမ်းယူရာ၌ ငြမ်းဆင်၍ သက်စွန့်ဆံဖျား ခဲယဉ်းစွာ လိုက်လံ စုဆောင်းကြရသည်။
မြန်မာနိုင်ငံတွင် ငှက်သိုက်ရသောကျွန်းများကို သစ်တောဌာနကထိုငှက်များမျိုးမပြုတ်သွားရလေအောင် စောင့်ရှောက်ပေးသည်။ ပမာစဉ်တလှည့်စီ ပိတ်ပေး သည်။ ပိတ်ထားသောကျွန်းများပေါ်၌ ငှက်ကလေးတို့သည် အနှောင့်အယှက်မရှိဘဲ အသိုက် ပြုလုပ်၍ ပေါက်ပွားနိုင်ကြလေသည်။ ထိုကျွန်းများပေါ်သို့ တက်ရောက်၍ ငှက်သိုက်များကို ခိုးယူတတ်ကြသော လူဆိုးတို့၏ရန်ကို၎င်း၊ ငှက်ကလေးများကို ဖမ်းယူတတ်သော သိမ်း၊ စွန်၊ ငှက်ရဲတို့၏ ရန်ကို၎င်း၊ သစ်တောဝန်ထမ်းများက ကာကွယ်ပေးကြရသည်။ စုဆောင်းရရှိသော ငှက်သိုက်များကို သစ်တောဌာနက စစ်ဆေးသည်။ အကယ်၍ သွေးပါသော ငှက်သိုက်များကို တွေ့ရှိပါက လိုင်စင်ရသူကို ဒဏ်ရိုက်လေသည်။ အဘယ်ကြောင့်ဆိုသော် ငှက်ကလေးများ သွေးပါသည်အထိ အန်ထုတ်၍ ပြုလုပ်ရသော အသိုက်များကို မယူကြရန် လိုင်စင်တွင် စည်းကမ်းချက်များ ပါရှိသောကြောင့် ဖြစ်သည်။

မှတ်ချက်။ မြန်မာ့စွယ်စုံကျမ်း အတွဲ ၃ မှ ကောက်နုတ်ဖော်ပြပါသည်။
Credit Link - Myawady News